Aag Daman Mein Lag Jayegi

آگ دامن میں لگ جائے گی دل میں شعلہ مچل جائے گا
میرا ساغر نہ چھونا کبھی ساقیا ہاتھ جل جائے گا

ایک دن وہ ضرور آئیں گے درد کا سایہ ٹل جائے گا
اس زمانے کی پرواہ نہیں یہ زمانہ بدل جائے گا

آ گیا میرا آنکھوں میں دم, اب تو جلوہ دکھا دیجئے
آپ کی بات رہ جائے گی میرا ارماں نکل جائے گا

بے سبب ہم سے روٹھو نہ تم یہ لڑائی بری چیز ہے
صلح کر لو خدا کے لئے __یہ برا وقت ٹل جائے گا

مئے کشو اس نظر کی سنو کہہ رہی ہے وہ شعلہ بدن
مئے نہیں جام میں آگ ہے جو پئے گا وہ جل جائے گا

کوئی آنسو نہیں آنکھ میں بات گھر کی ابھی گھر میں ہے
تم جو یونہی ستاتے رہے درد اشکوں میں ڈھل جائے گا

دور ہیں جب تلک تم سے ہم کیسے ہوگا مداوہء غم
اک دفع تم ملو تو صنم غم خوشی میں بدل جائے گا

گر یونہی گھر میں بیٹھا رہا مار ڈالیں گیں تنہائیاں
چل ذرا مئےکدے میں چلیں اے فنا دل بہل جائے گا​