اُس کا اپنا ہی کرشمہ ہے

اُس کا اپنا ہی کرشمہ ہے ، فَسوں ہے ، یوں ہے

یوں تو کہنے کو سبھی کہتے ہیں ، یوں ہے ، یوں ہے

جیسے کوئی درِدل پر ہو ستادہ کب سے

ایک سایہ نہ دَروں ہے ، بَروں ہے ، یوں ہے

تم نے دیکھی ہی نہیں دشتِ وفا کی تصویر

نوکِ ہر خار پہ اِک قطرہءِ خوں ہے ، یوں ہے

تُم محبت میں کہاں سُود و زیاں لے آئے

عشق کا نام خِرد ہے نہ جَنوں ہے ، یوں ہے

اب تم آئے ہو میری جان تماشا کرنے

اب تو دریا میں تلاطم نہ سکوں ہے ، یوں ہے

ناصحا تُجھ کو خبر کیا کہ محبت کیا ہے

روز آجاتا ہے سمجھاتا ہے کہ یوں ہے ، یوں ہے

شاعری تازہ زمانوں کی ہے معمار فراز

یہ بھی اِک سلسلہءِ کُن فَیَکوں ہے ، یوں ہے