Is baar woh mila to ajab us ka rang tha
Alfaaz mein tarang na lehja dabang tha
Ik soch thi ke bikhri hui khaal-o-khat mein thi
ik dard tha ke jis ka shaheed ang ang tha
Ik aag thi ke raakh mein posheeda thi kahin
ik jism tha ke rooh se masroof-e-jang tha
main ne kaha ke "yaar tumhein kya hua yeh"?
usne kaha ke "umr-e-rawaan ki ataa hai yeh"
main ne kaha ke "umr rawan to sabhi ki hai"
usne kaha ke "fikr-o-nazar ki saza hai yeh"
main ne kaha ke "sochta rehta to main bhi hun"
usne kaha ke "aaina rakha hua hai yeh"
dekha to mera apna hi aks-e-jali tha woh
woh shakhs main tha aur "Himayat Ali" tha woh
No comments:
Post a Comment