Mai apni so'ncho'n ka zahar apne badan ke ander guzarta hoo'n

Mai apni so'ncho'n ka zahar apne badan ke ander guzarta hoo'n,
Mai pahle karta hoo'n khud ko zinda phir apne haatho'n se maarta hoo'n,

Kasheed karta hoo'n talkh lamho'n se zindagi ki musarrato'n ko,
Mai zulfe hasti ke pe'ncho kham ko karhi rato'n mei'n sa'nwaarta hoo'n,

Feraq raato'n ke zakhm siita hoo'n apni palko'n se aur bazahir,
Jo looh dil per hai naqsh,chehra mei'n naqsh us ke ubharta hoo'n,

Na maalo zar ki mujhe talab hai,na jado hashmat se kuchh gharaz hai,
Mai'n apni fitrat ko zer karta hoo'n,apni marzi se hartaa hoo'n,

Mai qatl karta hoo'n apne saaye ko apne ander ki raushnii se,
Mai'n apne siine mei'n apne haatho'n se Tez jhanjar uTarTa hoo'n,

Mai janta hoo'n un aablo'n se na payas sahra ki bujh sakegi,
Mai aik saehra hoo'n Tashnagii ka,mai'n apnii rangat nikharta hoo'n,

Mai khud bhii apni sada ko Khusro sada ba sahra samajh ke chup hoo'n,
Mai'n goo'nge bahro'n ke darmiya'n hoo'n khamosh rah ker pukarta hoo'n.