Lab-E Khaamosh Se Afshaa Hogaa
Raaz Har Rang Mein Rusvaa Hogaa
Dil Ke Saharaa Mein Chali Sard Havaa
Abr Gulzaar Pe Barsaa Hogaa
Tum Nahin The To Sar-E-Baam-E-Khayaal
Yaad Kaa Koi Sitaaraa Hogaa
Kis Tavaqqo Pe Kisi Ko Dekhen
Koi Tum Se Bhi Hasin Kyaa Hogaa
Zeenat-E-Halqaa-E-Aaghosh Bano
Door Baitho Ge To Charchaa Hogaa
Zulmat-E-Shab Mein Bhi Sharmaate Ho
Dard Chamkegaa To Phir Kyaa Hogaa
Jis Bhi Fankaar Ka Shaahkaar Ho Tum
Us Ne Sadiyon Tumhen Sochaa Hogaa
Kis Qadar Karb Se Chataki Hai Kali
Shaakh Se Gul Koi Tootaa Hogaa
Umr Bhar Roye Faqat Is Dhun Mein
Raat Beeti To Ujaalaa Hogaa
Saari Duniyaa Hamen Pahchaanti Hai
Koi Ham-Saa Bhi Na Tanhaa Hogaa
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Labon Pe Narm Tabassum Rachaa Ke Dhul Jaayen
Khudaa Kare Mere Aansoo Kisi Ke Kaam Aayen
Jo Ibtada-E-Safar Mein Diye Bujhaa Baithe
Vo Bad-Naseeb Kisi Kaa Suraagh Kyaa Paayen
Talaash-E-Husn Kahaan Le Chali Khudaa Jaane
Umang Thi Ki Faqat Zindagi Ko Apanaayen
Bulaa Rahe Hain Ufaq Par Jo Zard-Roo Teele
Kaho To Ham Bhi Fasaane Ke Raaz Ho Jaayen
Na Kar Khudaa Ke Liye Baar-Baar Zikr-E-Bahisht
Ham Aasmaan Kaa Mukarrar Fareb Kyon Khaayen
Tamaam Maikadaa Sunsaan Maigusaar Udaas
Labon Ko Khol Kar Kuchh Sochti Hain Meenaayen
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Marun To Main Kisi Chehre Mein Rang Bhar Jaaun
`Nadeem` Kaash Yahi Ek Kaam Kar Jaun
Ye Dasht-E-Tark-E-Muhabbat Ye Tere Qurb Ki Pyaas
Jo Izaan Ho To Teri Yaad Se Guzar Jaaun
Mera Vajood Meri Rooh Ko Pukaarta Hai
Teri Taraf Bhi Chalun To Thahar Thahar Jaaun
Tere Jamaal Ka Paratau Hai Sab Haseenon Par
Kahan Kahan Tujhe Dhoondhun Kidhar Kidhar Jaaun
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Main Zinda Tha Ki Tera Intazaar Khatm Na Ho
Jo Too Mila Hai To Ab Sochta Hun Mar Jaaun
Ye Sochataa Hun Ki Main Butparast Kyun Na Huaa
Tujhe Qareeb Jo Paaun To Khud Se Dar Jaaun
Kisi Chaman Mein Bas Is Khauf Se Guzar Na Huaa
Kisi Kali Pe Na Bhoole Se Paanv Dhar Jaaun
Ye Ji Mein Aati Hai Takhleeq-E-Fan Ke Lamhon Mein
Ki Khun Ban Ke Rag-E-Sang Mein Utar Jaaun
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Wo Koi Aur Na Tha Chand Khushk Patte The
Shajar Se Toot Ke Jo Fasl-E-Gul Pe Roye The
Abhi Abhi Tumhen Socha To Kuch Na Yaad Aaya
Abhi Abhi To Ham Ek-Doosre Se Bichre The
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Zehnon Men Khayaal Jal Rahe Hain
Sochon Ke Alaaw-Se Lage Hain
Duniya Ki Girift Men Hain Saaye
Ham Apna Wujood Dhoondhte Hain
Ab Bhookh Se Koi Kya Marega
Mandi Men Zamir Bik Rahe Hain
Maazi Men To Sirf Dil Dukhte The
Is Daur Men Zehan Bhi Dukhe Hain
Sir Kaatate The Kabhi Shahanshah
Ab Log Zubaan Kaatate Hain
Ham Kaise Churayen Shab Se Daaman
Din Niklaa To Saaye Chal Pare Hain
Laashon Ke Hujoom Men Bhi Hans Den
Ab Aise Bhi Hausle Kise Hain
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Zeest Azar Hui Jaati Hai
Saans Talawar Hui Jaati Hai
Jism Bekaar Hua Jaata Hai
Rooh Bedaar Hui Jaati Hai
Kaan Se Dil Mein Utarti Nahin Baat
Aur Gufatar Hui Jaati Hai
Dhal Ke Nikli Hai Haqiqat Jab Se
Kuch Purasraar Hui Jaati Hai
Ab To Har Zakhm Ki Munh-Band Kali
Lab-E-Izahaar Hui Jaati Hai
Phool Hi Phool Hain Har Simt `Nadeem`
Raah Dushwaar Hui Jaati Ha
-------------------
Mujhe Kal Mera Ek Saathi Milaa
Jis Ne Ye Raaz Kholaa
Ke Ab Jazba-O-Shauq Ki Vahshaton Ke Zamaane Gaye
Phir Vo Aahistaa-Aahistaa Chaaron Taraf Dekhtaa
Mujh Se Kahne Lagaa
Ab Bisaat-E-Muhabbat Lapeto
Jahan Se Bhi Mil Jaaye Daulat Sameto
Gharz Kuchh To Tahzeeb Seekho
-----------------
Ret Se But Na Banaa Ai Mere Achche Fankaar
Ek Lamhe Ko Thahar Main Tujhe Patthar Laa Doon
Main Tere Saamne Ambaar Lagaa Dun Lekin
Kaun Se Rang Ka Patthar Tere Kaam Aayegaa
Surkh Patthar Jise Dil Kahti Hai Be-Dil Duniyaa
Yaa Vo Pathraai Hui Aankh Ka Neela Patthar
Jis Mein Sadiyon Ke Tahayur Ke Pare Hon Dore
Kya Tujhe Rooh Ke Patthar Ki Zaroorat Hogi
Jis Pe Haq Baat Bhi Patthar Ki Tarah Girti Hai
Ik Vo Patthar Hai Jise Kahte Hain Tahzeeb-E-Safed
Us Ke Mar-Mar Mein Siyah Khoon Jhalak Jaataa Hai
Ik Insaaf Kaa Patthar Bhi To Hotaa Hai Magar
Haath Mein Teshaa-E-Zar Ho To Vo Haath Aataa Hai
Jitne Mayaar Hain Is Daur Ke Sab Patthar Hain
Sher Bhi Raqs Bhi Tasveer-O-Ginaa Bhi Patthar
Mere Ilhaam Teraa Zahan-E-Rasaa Bhi Patthar
Is Zamaane Mein Har Fan Kaa Nishan Patthar Hai
Haath Patthar Hain Tere Meri Zuban Patthar Hai
Ret Se But Na Banaa Ai Mere Achche Fankaar
-------------------
Shaam Ko Subah-E-Chaman Yaad Aai
Kis Ki Khushboo-E-Badan Yaad Aai
Jab Khayaalon Mein Koi Mod Aaya
Tere Gesoo Ki Shikan Yaad Aai
Yaad Aaye Tere Paikar Ke Khutoot
Apni Kotaahi-E-Fan Yaad Aai
Chaand Jab Door Ufaq Par Doobaa
Tere Lahaje Ki Thakan Yaad Aai
Din Shuaaon Se Ulajhte Guzraa
Raat Aai To Kiran Yaad Aai
------------------
Ahmed Nadeem Qasmi Mushaira - Michigan USA
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Ahmad Nadeem - Mushaira - Zindagi Ke Jitne Darwaze
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Ahmed Nadeem Qasmi - Mushaira 1998 -
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Ahmed Nadeem Qasmi - Mushaira - Yeh Hikayat Hai Koi
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
Ahmed Nadeem Qasmi - Mushaira - Tang Aa Jaate hain
♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
No comments:
Post a Comment