اِک دوسرے کی بات کا کیسے یقین ہو

اِک دوسرے کی بات کا کیسے یقین ہو

کچھ اعتماد کر تو کروں گفتگو شروع

بنیاد رکھنے کے لیے کچھ تو زمین ہو

دِل کا حرم ، کرائے کا کمرہ نہیں جناب!

اِس گھر کے آپ اوّل و آخر مکین ہو

چہرہ دھنک کے رنگ کو شرما رہا ہے تم

رفعت کے آسمان کی زُہرہ جبین ہو

آمد سے ایک حور کی یکسر بدل گیا

جیسے یہ گھر زمین پہ خلد برین ہو

پاؤں کو چومنے کی اِجازت فقط ملی!

پھر کیا ہوا یہ سوچ لو ، تم تو ذہین ہو

یعنی کہ ’’کن‘‘ سے توُ نے انہیں بھی بنا دیا

پھر تو خدایا تجھ پہ ہزار آفرین ہو

کس سے کریں شکایتیں ہم اہلِ حسن کی

جب ’’حسنِ بے مثال‘‘ ہی مسند نشین ہو

چہرے کی خیر ، اِس پہ نشیب آ بھی سکتا ہے

دِل دیجیے اُسی کو جو دِل کا حسین ہو

جب قیس آئینہ بھی انہیں ڈانٹنے لگا

بانہوں میں تھام کر کہا : ’’دلکش ترین ہو!‘‘